اهي اخت جوزي
أهي أخت جوزي، هتخدمني ببلاش بدل ما ندفع فلوس لخدامة! …. سمعت مرات أخويا وهي بتضحك عليّا، بس اللي اكتشفته بعدها قلب حياتي! أنا اسمي سارة، وعندي أخ واحد اسمه أحمد، هو مش مجرد أخويا، ده كان أقرب حد ليا في الدنيا، وكنت دايمًا بحس إن ضهري مسنود بيه، خصوصًا بعد ما بابا وماما ماتوا وسابونا لبعض.
أحمد اتجوز من سنتين واحدة اسمها ندى، ومن أول يوم جوازهم وأنا بحاول على قد ما أقدر إني أكون أخت كويسة ليه، وأقف جنب مراته، وأعاملها كأنها أختي بالظبط. ولما عرفت إنها حامل، فرحتلها من قلبي، وكنت كل ما أروح أزورها آخد معايا حاجة للبيبي، وأسألها لو محتاجة أي حاجة.
بس اللي ما كنتش واخدة بالي منه، إن طيبتي دي كانت بالنسبالها فرصة إنها تستغلني! في يوم، أحمد كلمني وقال لي إن ندى تعبانة من الحمل، وإنها مش قادرة تعمل شغل البيت، وطلب مني أروح أقعد معاها شوية وأساعدها لحد ما تتحسن.
من غير تفكير، لبست ونزلت على طول… وصلت البيت، لقيت ندى قاعدة في الصالة، وأختها هبة قاعدة معاها، ووالدتها كمان كانت موجودة. سلمت عليهم، ودخلت قعدت معاهم شوية، ولما لاحظت إن المطبخ مليان مواعين، قمت من نفسي وقلت طب أنا هدخل أغسل المواعين وأظبط المطبخ، وإنتوا اقعدوا ارتاحوا.
ندى بصتلي بابتسامة غريبة وقالت ربنا يخليكي يا سارة، أصل أنا فعلًا مش قادرة أتحرك من مكاني. دخلت المطبخ، ولبست جوانتي، وبدأت أغسل المواعين اللي كانت متكومة في الحوض، وبعدها مسحت الرخامة ورتبت الحاجات اللي حواليها. حصري على صفحة روايات و اقتباسات.
. كنت بغسل وأنا مبسوطة إني بساعد أخويا ومراته، ومش مستنية من حد شكر ولا مقابل. لكن فجأة، سمعت صوت هبة من الصالة وهي بتقول لندى إنتِ يا بنتي ما تعمليش أي حاجة خالص، إنتِ حامل ولازم ترتاحي، وسيبي الشغل ده كله لحد تاني.
ضحكت ندى وقالت بمنتهى البرود ما هو جوزي جايبلي أخته بدل الخدامة! مستكتر يجيبلي واحدة تساعدني، فقولتله هاتلي أختك، أهي ببلاش وأحسن من إني أدفع فلوس لحد. إيدي وقفت تحت الميه، وحسيت إن قلبي اتقبض.
قلت يمكن أنا سمعت غلط، يمكن قصدها حاجة تانية، لكن هبة كملت كلامها وهي بتضحك طب وإنتِ مستحملاها إزاي؟ دي شكلها من النوع اللي بيحب يعمل فيها طيبة وعلى نياتها! ندى ردت عليها وهي بتقهقه ما هي فعلًا مش بتعمل حاجة حلوة، بس أنا هتصرف معاها!
