اطلعي بره يا صايعة
انتقام رحمه بقلم نرمين عادل همام
«اطلعي بره يا صايعة أنتِ وولاد الحرام أل خلفتيهم!»
صرخة الحاجة “حميدة” كانت بتبخ سم في وشي قبل ما برودة الليل ورطوبة الشارع تلمس جلدي، وزوجي “هشام” واقف وراها على عتبة الشقة، بيكمل النقص ويرميني أنا وعيالي اللي لسه مكملوش 10 أيام في عز الليل!
حميدة كانت بتبص لي بقرف، وبترمي شنطة هدومي في أحضاني، وهشام زق السرير المتحرك بتاع العيال الخشب بره الباب كأنه بيرمي كيس زبالة في الشارع!
التوأم بتوعي — “ياسين ” و”فريدة” — كان عندهم 10 أيام بس من القيصرية. الدنيا كانت ضلمة كحل، والهوا كان بيقطع في الجلد من برودته. فريدة بدأت تعيط الأول من الخضة، وبعدها ياسين ، أصواتهم كانت بتطلع بضعف ومكتومة من تحت البطاطين الخفيفة اللي لحقت ألفهم بيها بالعافية.
بصيت لهشام وقلت بصوت هادي ومكتوم من الألم:
— حرام عليك يا هشام.. الليل كحل والجو تلج، العيال لسه حته لحمه !
رد عليّ بعين باردة كأنها أزازت تلج وقال:
— كنتِ فكري في كدة قبل ما تصغري عقلي وتكسفينا قدام الناس والجيران ونقول مراتي مش قادرة على عيشتنا!
_عملت ايه لكل دا
_اتنمردتي ورديتي على امي في العزومة وحاولتي تثبتي ان دا بيتك
_امك شتمتنى
_تشتم براحتها دي امي ولما تقولك خدمي على الضيوف تسمعي كلامها
بصيت وراه.. البيت الكبيير العالي ده، الرخام اللي مغطي المدخل، والسلالم والمحلات اللي تحت، ده العقار اللي أنا اشتريته بدم قلبي ومن فلوسي الخاصة من شغل المقاولات والديكور قبل ما أتجوز الكائن ده بثلاث سنين! بس كتبته باسم شركة تأسيسية عشان محدش يعرف قرشي جاي منين.
أمه حميدة كانت واقفة بقميص نوم حرير فاخر ومستندة على درابزين السلم الكريستال، ماسكة كاس عصير ومبتسمة كأنها ملكة بتتفرج على خدامة بتطردها من ملكها:
— تستهلي خليكي كدا في السقعه علشان تعرفي كلام مين ال بيتسمع
هشام ضحك بسخرية وهو بيلف السلسلة الذهب في إيده:
— دي حتى معرفتش تحافظ على شغلها الغلبان بتاع التصميمات والرسومات بعد ما حملت بقت عالة ومصاريف على الفاضي!
كنت عايزة أبتسم في وشهم وأضحك بعلو صوتي.. هما بجد مصدقين الكلام ده؟! بقالى سنتين سايباهم يعيشوا الوهم، يفتكروا إني مجرد مصممة غلبانة على باب الله، هادية ومستنية المصروف منهم. سبت هشام يتنطط بمنصبه كمهندس تنفيذ في شركة “المقاولون للمشاريع الكبرى” وهو ما يعرفش إني بملك أكثر من 70% من أسهم الشركة الأم اللي بتشغّله!
